Кулун тутар 20 күнүгэр оскуола иһинэн ыытыллар “Төрөппүт тэрийэр фестиваля” диэн тиэмэлээх тэрээһиҥҥэ биһиги кылаас төрөппүттэрэ, оҕолорбутун кытта “Өбүгэм бэлэҕэ” диэн оҕо инникитин идэтин талынарыгар аналлаах тэрээһин ыыттыбыт.
Хас биирдии киһи бэйэтин төрдүн –ууһун, өбүгэлэрин, кинилэр олохторун –дьаһахтарын, удьуор дьарыктарын, көлүөнэттэн көлүөнэҕэ бэриллэн иһэр үтүө үгэстэрин билиэхтээх. Бэйэтин төрдүн –ууһун үчүгэйдик билэр, дьонунан –сэргэтинэн киэн туттар киһи олоххо бигэ тирэхтээх буолар.
Биһиги бу үлэбитин кылааспыт салайааччытын Анна Серафимовнаны кытта 5 кылаастан саҕалаабыппыт. Ол курдук, 5 кылааска үөрэнэ сылдьан, оҕолор хос эһээлэрин, эбээлэрин, абаҕаларын, таайдарын, кырдьаҕас эдьиийдэрин туһунан өйтөн суруйууларынан “Нет безымянных солдат” диэн хомуурунньук оҥорон таһаарбыппыт. 6 – 7 кылааска эбээлэрин, эһээлэрин,ийэлэрин, аҕаларын туһунан өйтөн суруйбуттара.
Бу өйтөн суруйуулар түмүктэринэн, сүрдээх үчүгэй чинчийии таҕыста. Ол курдук, хас биирдии оҕо бэйэтин төрдүн-ууһун, өбүгэлэрин, кинилэр олохторун-дьаһахтарын, удьуор дьарыктарын, айылҕаттан бэриллибит дьоҕурдарын-талааннарын уерэттилэр, чинчийдилэр. Ол түмүгүнэн кылааска 26 оҕоттон хаанынан бэриллибит маннык дьоҕурдар таҕыстылар: үҥкүүһүттэр, ырыаһыттар, илиигэ дьоҕурдаахтар, спортсменнар, оратордар, учууталлар, быраастар, юристар, программистар, бухгалтердар.
Оҕо идэтин сөпкө таларыгар бу бырайыакпыт үгэскэ кубулуйан, сылтан-сыл аайы төрөппүт көҕүлээһининэн өссө дириҥник чинчийиллэн иһиэн наада.Өбүгэлэртэн кэлбит талааны, дьоҕуру таба тайанан оҕолорбут айымньылаах үлэ аартыгар эрэллээхтик хардыылыахтара диэн баҕа санаабытын этэбит.
Оскуола төрөппүтүн комитетын председателэ, 8 б кылаас төрөппүтэ
Белолюбская Туяра Афанасьевна
Свежие комментарии