Сэтинньи 12 күнүгэр Аллараа Бэстээх иккис нүөмэрдээх орто оскуолатыгар интернет ситим нөҥүө Иккис таһымнаах «Covid 19» инфекционнай отделения салайааччыта Иван Петрович Луцканы кытары бэрт интириэһинэй көрсүһүү буолан ааста. Кини оскуола оҕолоругар бүтүн аан дойдуну аймаабыт Коронавирус, ол эбэтэр «Covid 19» ыарыы туһунан сиһилии кэпсээтэ, хайдах бэйэни харыстана сылдьарга, тулалыыр, чугас дьоммутун хайдах харыстыыр туһунан иһитиннэрдэ.
Бу көрсүһүү туһунан кыратык сырдаттахха маннык:
Бу сурдээх куһаҕан уонна күүстээх ыарыы эбит. Ол курдук мөлтөх иммунитеттаахтарга, кырдьаҕас дьоҥҥо, кыра оҕолорго ыараханнык киирэр эбит, быраастар сатаан быыһаабат да түгэннэрэ үөскүөн син.
Коронавирус тымныйыыттан, грипптэн уратыта диэн, киһи тыҥатын быһыта сиэн син эбит. Коронавируһунан, ол эбэтэр «Covid 19» ыарыынан ыарыйдаххына этин температурата тахсар, күүстээхтик уонна элбэхтэ сөтөллөҕүн, ас амтанын, сыты сатаан ылбат буолаҕын, сэниэн эстэн, сылайа сылдьар буолаҕын.
Ыарыы сыстыбатын туһугар үчүгэйдик харыстана сылдьыахтааххын. Элбэх дьон сылдьар сиригэр, маҕаһыыннарга, уопсай транспортарга куруук булгуччу масканы, бэрчээккэни кэтэ сылдьар ирдэнэр, өскөтүн уочаракка турдаххына 1,5 миэтэрэ дьонтон ыраах туруохтааххын. Антисептик, влажнай салфетка укта сылдьар туһалаах. Дьиэҕэр кэллин эрэ илиигин мыылалаах уунан хайаан да суунуохтааххын.
Бу ыарыыны кыайар эми булаары учуонайдар күн түүн үлэлииллэр.
Бу курдук кэпсээн баран Иван Петрович оҕолор саамай интириэһиргиир ыйытыктарыгар хоруйдаата.
Холобур:
– Бу ыарыы хаһан суох буоларый?
– Вакцина буллахтарына
– Бу ыарыы хантан кэлбитэй?
– Бу ыарыы Китай Хубэй провинциятын Ухань диэн куоратыгар бастаан биллибитэ.
Кэпсэтии түмүгэр Иван Петрович көрсүһүү кыттыылаахтарыгар бэйэҕитин харыстана сылдьын, чугас дьоҥҥутун харыстаан, ыалдьыман диэн баҕа санаатын тиэртэ уонна бу ыарыыны кыайыахпыт диэтэ.
Ити курдук бэрт интириэһинэй, туһалаах көрсүһүү буолан ааста.
Загрузка ...
Свежие комментарии